काम नगर्ने ठेकेदारलाई कालो सूचीमा राख्न मुख्यमन्त्री पोखरेलको कडा निर्देशन

दाङ्गमा निर्माणाधिन पुलको अनुगमनपछि सरोकारावाला निकायलाई आवश्यक निर्देशन दिंदै मुख्यमन्त्री पोखरेल । साथमा प्रतिनिधिसभा सदस्य, मेयर लगायत जनप्रतिनिधि ।

दाङ्ग : मुख्यमन्त्री शंकर पोखरेलले निर्माणाधिन पुल तथा सडक निश्चित समयसीमामा पूरा गर्ने प्रतिबद्धतासहित काम नगर्ने ठेकेदार कम्पनीलाई ठेक्का तोडेर कालोसूचीका लागि सिफारिश गर्न निर्देशन दिएका छन् । लामो समयदेखि सुस्त काम भइरहेका घोराही—तुलसीपुर खण्डका आधादर्जन पुलको स्थलगत निरीक्षणपछि डिभिजन सडक कार्यालय दाङका अधिकारीहरुलाई सुस्त निर्माणको कामलाई गति दिन सक्रिय हुन निर्देशन दिए ।

मुख्यमन्त्री पोखरेलसहितको निरीक्षणमा प्रतिनिधिसभा सदस्य हिराचन्द्र केसी, शान्ता चौधरी, घोराही उपमहानगरपालिकाका प्रमुख नरुलाल चौधरी, तुलसीपुर उपमहानगरपालिकाका प्रमुख घनशयाम पाण्डे, प्रमुख जिल्ला अधिकारी गजेन्द्रबहादुर श्रेष्ठ, सडक कार्यालयका इन्जिनियर लिलाबहादुर भण्डारी र पत्रकारको टोली सहभागी थियो । बबई खोला, सिस्नेखोला, कटुवाखोला, गुज्रेखोला, पत्रेखोला, संक्राम खोला, ग्वारखोला लगाएतका ठाउँमा निर्माणाधिन अबस्थाका पुल र घोराही तथा तुलसीपुर बजारमा विस्तार भैरहेको सडकको अबस्थाका बारेमा जानकारी लिदै मुख्यमन्त्रीले सुस्त निर्माणले लक्षित उपलब्धी हासिल गर्न नसक्ने बताए ।
मुख्यमन्त्री पोखरेलले अबको तीन महिना भित्र घोराही र तुलसीपुर बजारका बिस्तारित सडकहरु निर्माण गरिसक्ने गरी काममा निगरानी बढाउन निर्देशन दिए । उनले पेटी ठेकेदार मार्फत काम नगर्न र टुक्रे योजनामा फरक फरक ठेक्का लगाउने काम रोक्न सडक कार्यालयलाई निर्देशन दिए । उनले जसरी भए पनि गुणस्तरीय काम हुनुपर्ने र आगामी वर्षायाम अगावै पुल तथा सडक सञ्चालनमा ल्याउन सडक कार्यालय र निर्माण व्यवसायीलाई निर्देशन दिए । ।

प्रकाशित मितिः बुधबार, मंसिर १२, २०७५     6:31:43 PM